ՀԱՊԿ գլխավոր քարտուղար. Ուղղաթիռի ոչնչացումը բռնության վտանգավոր դրսևորում է
Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Նիկոլայ Բորդյուժան հանդես է եկել հայտարարությամբ ադրբեջանական կողմի` նոյեմբերի 12-ին Արցախի ՊԲ ուղղաթիռի խոցման միջադեպի առնչությամբ`շեշտելով, թե ուղղաթիռի ոչնչացումը բռնության վտանգավոր դրսևորում է:
Հայտարարությունը հրապարակվել է կազմակերպության կայքում:
Ինչպես նշված է հայտարարության մեջ, նոյեմբերի 12-ին Արցախյան հակամարտության գոտում ադրբեջանական կողմը խոցել է ուսումնամարզական թռիչք կատարող ուղղաթիռ: Ուղղաթիռի անձնակազմը զոհվել է: Նա նաև նշել է, որ այս վտանգավոր միջադեպը սադրում է իրադրության հետագա սրումը տարածաշրջանում և ուժեղացնում անհանգստությունը:
«2014-ի ընթացքում ադրբեջանական ու ղարաբաղյան զորքերի շփման գծում, ինչպես նաև հայ-ադրբեջանական սահմանին գրեթե միշտ զինված միջադեպեր են եղել: Միայն ամառվա երեք ամիսների ընթացքում հրադադարի ռեժիմը խախտվել է մոտ 1500 անգամ: Դրանով հանդերձ` կրակ էր բացվել նաև բնակելի տարածքների ու խաղաղ բնակչության ուղղությամբ: Գրանցվել էին հետախուզադիվերսիոն խմբերի` շփման գիծը հատելու փաստեր, որոնք ուղեկցվել էին բռնությամբ ու խաղաղ բնակիչների մահվամբ: Այսօր մենք ականատեսն ենք դարձել հրադադարի պայմանագրի նոր խախտման: Ուղղաթիռի ոչնչացումը բռնության վտանգավոր դրսևորում է»,- նկատել է նա:
Նրա խոսքերով` սպառնալիք է ծագել հակամարտության նոր սրման:
«Իրավիճակը Հարավային Կովկասում ավելի ու ավելի սուր է դառնում: Մենք խորապես համոզված ենք իրադրության սպառնացող զարգացման կասեցման անհրաժեշտության մեջ: Գլխավոր գործոնը, որ կարող է դեպքերի նման շրջադարձը կանխել, ուժի կիրառումից հրաժարվելն է, կրակի դադարեցման պայմանագրի պարտադիր կատարումը, սադրիչ գործողություններ թույլ չտալը: Կարևոր է ապահովել Լեռնային Ղարաբաղի խնդրի լուծման բանակցային գործընթացի շարունակությունը»,- հայտարարել է Բորդյուժան:
Հիշեցնենք, որ Արցախի Պաշտպանության բանակի մամուլի ծառայության փոխանցմամբ` նոյեմբերի 12-ին` տեղական ժամանակով ժամը 13:45-ի սահմաններում, շփման գծի արևելյան հատվածի օդային տարածքում Ադրբեջանի ԶՈւ-ի կողմից հրադադարի ռեժիմի խախտման պատճառով խոցվել է Արցախի ՌՕՈւ Մի-24 ուղղաթիռ, որն ուսումնամարզական թռիչք էր կատարում: Այն տարածքը, որտեղ արձանագրվել է միջադեպը, շփման գծին բավականին մոտ է: Հակառակորդը միջադեպից հետո շարունակել է տարբեր տրամաչափերի զենքերից ինտենսիվ կերպով կրակ բացել միջադեպի վայրի ուղղությամբ:
Միևնույն ժամանակ, ՀՀ ՊՆ մամուլի քարտուղար Արծրուն Հովհաննիսյանն իր ֆեյսբուքյան էջում գրել է, որ Արցախի հետ սահմանային հատվածում Ադրբեջանի ԶՈւ-ն աննախադեպ սադրանք իրականացրեց, որը հանգեցրել է նաև իրավիճակի սրմանը, իսկ ադրբեջանական կողմի հնարանքները, թե իբր հայկական ուղղաթիռներն իրենց դիրքերի ուղղությամբ հարձակման փորձեր են արել, ու իբրև թե իրենք էլ միայն պատասխանել են այս քայլին, անհեթեթ են:
«Ուղղաթիռի բեկորների ուսունասիրությունը թույլ կտա հաստատել, որ ուղղաթիռը զինված չի եղել: Իրավիճակի այս լարումը ադրբեջանական կողմից շարունակվում էր, երբ ուղղաթիռը արդեն ընկած էր: Ավելին, ադրբեջանական կողմի կրակահերթը նաև թույլ չէր տալիս, որ անգամ օդաչուներին մոտենան: Այս աննախադեպ լարման հետևանքներն ադրբեջանական կողմի համար շատ ցավոտ կլինեն և կմնան Ադրբեջանի ռազմաքաղաքական ղեկավարության խղճին: Ուղղաթիռի հրամանատարն էր մայոր Սերգեյ Սահակյանը: Անձնակազմի հետագա ճակատագրի մասին տեղեկություններ կհայտնենք»,- նշել է Արծրուն Հովհաննիսյանը:
Նյութեր թեմայի շուրջ
ԼՂՀ ՊՆ. Իրադրությունն առաջնագծում լարվել է
Սահմանին լարված իրավիճակն առայժմ հնարավորություն չի տալիս մոտենալ խոցված ուղղաթիռին. Ա. Հովհաննիսյան
Կատարվածը ադրբեջանական վարչակազմի ձեռքի գործն է. Ֆրանսուա Ռոշբլուան
Լրահոս
Տեսանյութեր
Արցախի ղեկավարությունը Բաքվում է, որովհետև նրանք առաջնորդել են մեր քաղաքական պայքարը. Բեգլարյան
